عبده مغربى .. لــ السيسى “الراجل ده لازم يمشى”

بواسطة أمير عكاشة / منشور في السبت, 12 مارس 2016 19:58 مساءً / لا توجد تعليقات
عبده مغربى .. لــ السيسى "الراجل ده لازم يمشى"
عبده مغربى
كتب :- عبده مغربى

 

 

 

 

“ياخي بالفعل مفيش إنجاز واحد لـ ‫#‏السيسي‬ .. الراجل ده لازم يمشي ..”

الكهرباء لسه بتقطع ليل نهار.. وطوابير البنزين لساها قافلة الشوارع ..ومحطات البنزين بقت زيها زي طوابير العيش ..وسوء حالة الرغيف بقت الشغل الشاغل للناس بعد ما فاض بيها الكيل.. وكله كوم وأزمة أنابيب البوتجاز لوحدها كوم تاني.. مش عارف يسيطر عليها لحد دلوقتي .

الأزمة الإقتصادية في عهده منعتنا نشتري غواصات من ألمانيا، وكمان معرفش يجيب لنا طيارات “رافال” عشان الردع البعيد، ولا قدر يتعاقد علي حاملات طائرات “ميسترال”عشان نطور قواتنا البحرية.. الفرقاطات “فريم” متعددة المهام أصبحت بعيدة المنال.

منظومة صواريخ الـ “إس ٣٠٠” الروسية فشل يجيبها عشان خايف من أمريكا، لدرجة إنه كمان خاف يشتري السوخوي الروسية التي تضاهي الـ “إف ٣٥” الأمريكية عشان البيت الأبيض ميزعلش.

راح الصين ومن هناك دفع لجريدة “يديعوت أحرنوت” الإسرائيلية عشان تهاجمه وتزعم إنه حيشتري من”بكين” الـ ٤٨ طيارة من نوع “جي إف ١٧” المعروفة بإسم “التنين الشرس”، وطلب من القناة العاشرة الإسرائيلية أن تهاجمه في حلقة كاملة عن خط الإنتاج المصري الصيني الذي وقعته “القاهرة” و”بكين”للإنتاج المشترك لهذا النوع من الطائرات.

ورطنا في حرب اليمن مع السعودية وفي هجوم بري علي ليبيا ورضخ للرياض في إنه يهجم بالجيش المصري علي سوريا عشان دول الخليج اللي بتتبرع لينا متزعلش.

قناة السويس مقدرش يكون فيها قد التحدي ولسه الكراكات شغالة فيها ما خلصتش .. والشقق الجديدة في المحافظات مفيش مقاول راضي يشتغل فيها..

المزارع السمكية اللي حتنتج آخر السنة آلاف الأطنان من السمك مجرد وهم ..والصور المنشورة ليها خداع، وشبكة الطرق اللي أشار ليها في حملته الإنتخابية متحققش منها ولا حاجة وعايز تتأكد من كده اطلع طريق الإسماعيلية الصحراوي حتلاقي كل شوية تقاطعات .. أوعي ييجي في بالك إن الكباري اللي عليه دي حقيقة .. اوعي .. كمان اوعي يجي في بالك إنك تسافر علي طرق الجيش الجديدة في “الواحات”.. أو”الصحراء الغربية” أوفي ” الصعيد” أو في “البحر الأحمر” وغيرها .. اوعي .. أصلها لسه متعملتش .. مش حتلاقي منها حاجة علي أرض الواقع .. والناس اللي بيقولولك إنهم بيسافروا عليها دول من حملة السيسي الإنتخابية غاويين ينشروا إشاعات .. وزيادة في التأكيد اطلع علي الطريق الدائري حوالين القاهرة .. حتشوف إزاي بقي أسوأ من الأول.. شبكة الكباري اللي عليه والممرات الجانبية الجديدة أوعي تستخدمها دي كلها فوتوشوب.

وأكبر كارثة إرتكبها الراجل ده هي كلامه اللي قال فيه إنه حيستغل الطاقة القوية للجيش في إحداث التنمية الشاملة .. لإنه وقت الجد تراجع .. الجيش لسه قاعد كله في الثكنات يأكل ويشرب ببلاش من ميزانية الدولة زي ماكان طوال الـ٤٣ سنة اللي فاتت ..

“ياخي بالفعل مفيش إنجاز واحد للسيسي .. الراجل ده لازم يمشي ..”

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *